Röskva hvetur nýja ríkisstjórn til þess að hlusta á stúdenta

Röskva, Samtök félagshyggju fólks við Háskóla Íslands segir ráðamenn ítrekað hafa hundsað kröfur námsmanna um að styrkja stoðir þjóðarinnar með því að huga betur að hugviti og fjölbreyttri menntun. Samtökin segjast ekki munu una því að næsta ríkisstjórn skelil skollaeyrum við kröfum og óskum íslenskra stúdenta.

Þetta kemur fram í ályktun frá félaginu. Þar segir ennfremur að íslenska þjóðin hafi knúið fram kosningar í vor og nú standi einnig fyrir dyrum breytingar á skipan ríkisstjórnarinnar.

„Fráfarandi ríkisstjórn hafði uppi háfleyg orð um mikilvægi menntunar, bæði í upphafi stjórnarsamstarfsins og einnig eftir að bankakerfið hrundi. Stúdentar eygðu von um að loksins fengju menntamál þann sess sem þeim ber og að yfirvöld ætluðu sér að starfa með stúdentum. Reyndin hefur verið öll önnur," segir í yfirlýsingu frá félaginu.

„Stúdentadaginn 1. desember 2008 var menntavitinn reistur á Austurvelli. Á hann voru kröfur allrar íslensku námsmannahreyfingarinnar listaðar í átta töluliðum. Bréf námsmanna var sent öllum þingmönnum og þessar kröfur ítrekaðar.

Svörin sem bárust voru áform um 1,5 milljarða niðurskurð til Lánasjóðs íslenskra námsmanna og 950 milljóna niðurskurð til Háskóla Íslands. Og að öðru leyti þögn."

Í ljósi samstarfsslita ríkisstjórnarinnar og Alþingiskosninga vorið 2009 sendir Röskva frá sér eftirfarandi

ÁLYKTUN

- Röskva krefst róttækra viðhorfsbreytinga af hálfu yfirvalda. Við þurfum ríkisstjórn með styrk til þess að móta menntastefnu til framtíðar og leysa vandamálin sem steðja að.

- Röskva vill ekki að baráttumál sín líði fyrir vanhæfni ríkisstjórnar, hverjir sem í henni sitja. Röskva mun berjast fyrir hagsmunum stúdenta en stólar á samstarf við stjórnvöld og treystir því að næsta ríkisstjórn sýni vilja til samvinnu.

- Röskva skorar á stjórnvöld að gera hvað sem þau geta til að halda stúdentum í landinu. Röskva mun gera öllum stjórnmálaflokkum það ljóst að málefni HÍ og stúdenta verða að vera í forgrunni þegar horft er til framtíðar þessa lands. Ný ríkisstjórn verður að hlusta á kröfur stúdenta í komandi samningum við LÍN, annars má búast við stórfelldum landflótta þeirra.

- Röskva krefst þess að stjórnmálamenn taki til í stefnuskrám sínum og leggi fram trúverðuga stefnu í málefnum Háskólans, menntunar almennt og öðrum hagsmunamálum stúdenta.

- Röskva fagnar því að efnt hafi verið til kosninga og ítrekar þá kröfu sem allar námsmannahreyfingar á Íslandi settu fram í sameiningu þann 1. desember:

Að stjórnvöld taki höndum saman við aðra Íslendinga við að byggja upp

samfélag grundvallað á þekkingu, jafnrétti, félagslegu réttlæti og

manngildi.

Röskva mun ekki una því að næsta ríkisstjórn Íslands skelli skollaeyrum við kröfum og óskum íslenskra stúdenta og enn síður mun hún sætta sig við að raunveruleg verðmæti, eins og menntun þjóðarinnar, sitji áfram á hakanum. Ráðamenn, takið mark á rödd stúdenta!