Þúsundir sjóðsfélaga eiga rétt á skaðabótum

Með nýuppkveðnum dómum Héraðsdóms Reykjavíkur í málum 18 sjóðsfélaga í peningamarkaðssjóði Landsbankans var fallist á sameiginlega bótaskyldu Landsbankans og Landsvaka vegna þess tjóns sem sjóðsfélagarnir urðu fyrir við slit sjóðsins. Eru þetta fyrstu dómarnir sem falla eftir bankahrunið þar sem einn af gömlu bönkunum er dæmdur bótaskyldur gagnvart viðskiptavinum sínum.

Haukur Örn Birgisson lögmaður hjá ERGO lögmönnum, sem fluttu málin fyrir hönd sjóðsfélaganna, segir að dómarnir hafi áhrif á stöðu allra sjóðsfélaga í peningamarkaðssjóðnum. „Með dómunum var viðurkennd bótaskylda þeirra sjóðsfélaga sem urðu fyrir skerðingu þegar peningamarkaðssjóðnum var slitið. Bótaskyldan nær jafnt til aðila dómsmálanna og annarra sjóðfélaga sem voru í sömu sporum."

Hluthafaskírteinishafar í peningamarkaðssjóði Landsbankans voru um 15 þúsund talsins og er því ljóst að bótaskylda Landsbankans og Landsvaka er umtalsverð.

„Til að eiga möguleika á því að fá tjón sitt bætt í samræmi við niðurstöðu héraðsdóms verða sjóðsfélagar hins vegar að beina kröfu að Landsvaka og þrotabúi Landsbankans. Langt er liðið á kröfulýsingarfrest í þrotabú Landsbankans og verða sjóðsfélagar því að bregðast skjótt við."

Haukur Örn vill hins vegar ekki fullyrða að tjónið fáist bætt. „Þótt bótaskylda hafi verið viðurkennd með dómi er útilokað að segja hvort og þá hve mikinn hluta tjóns síns sjóðsfélagar munu fá bættan. Eignastaða gamla Landsbankans og Landsvaka mun að lokum ráða því en sjóðsfélagar verða hins vegar að beina kröfum sínum að þessum aðilum til að þær komi til álita. Sjóðsfélagar ættu því að leita sér lögmannsaðstoðar til að koma kröfum sínum á framfæri," segir Haukur Örn.

Á vefsíðunni www.sjodsfelagi.is má finna nánari upplýsingar um stöðu sjóðsfélaga gagnvart hinum bótaskyldu aðilum.