Henry kominn með fimmtíu landsliðsmörk fyrir Frakkland

Thierry Henry tryggði Frökkum 1-1 jafntefli í Serbíu í undankeppni HM í gær og sá til þess að Serbar náðu ekki að tryggja sér sigurinn í riðlinum og þar með sæti á HM í Suður Afríku. Markið var ennfremur það fimmtugasta sem hann skorar í 113 landsleikjum.

„Við sýndum í kvöld að það er frábært andrúmsloft í liðinu," sagði Henry eftir leikinn en Frakkar þurftu að spila manni færri í 81 mínútu en náðu engu að síður að koma til baka og jafna leikinn. Liðið hafði verið gagnrýnt harðlega fyrir að ná aðeins jafntefli á móti Rúmeníu um síðustu helgi.

Henry er fyrsti Frakkinn sem nær að skora 50 mörk fyrir landsliðið en hann hafði áður bætt markamet Michael Platini sem skoraði 41 landsliðsmark frá 1976 til 1987.

Henry gerir sér grein fyrir því að leið Frakka á HM þarf að öllum líkundum að fara í gegnum umspilið. „Við munum berjast um annað sætið í riðlinum. Við ætlum að komast á HM hvernig sem við förum að því. Þetta lið hefur sterka sál," sagði Henry.

Frakkar eru fjórum stigum á eftir Serbum þegar aðeins sex stig eftir í pottinum. Frakkar hafa jafnframt fjögurra stiga forskot á Austurríki sem er í 3. sæti og Frakkar eiga báða leikina sem þeir eiga eftir á heimavelli - á móti Austurríki og Færeyjum.