Ancelotti mun funda með Terry í dag

Carlo Ancelotti, knattspyrnustjóri Chelsea, mun funda með John Terry, fyrirliða liðsins, í dag um hvort hann vilji vera áfram í herbúðum félagsins.

Manchester City hefur lagt fram tilboð í Terry og er reiðubúið að gera hann að launahæsta leikmanni heims.

Ancelotti hefur formlega störf hjá Chelsea í dag. Félagið hafnaði boði City í Terry í síðustu viku en félagið er sagt reiðubúið að borga 40 milljónir punda fyrir hann.

Ekkert hefur heyrst frá Terry um málið. Margir velta því fyrir sér hvort að hann ætli sér að nota samningstilboð City til að knýja fram ný og betri launakjör hjá Chelsea.