Argentínska pressan: Messi var aðeins skugginn af sjálfum sér

Fjölmiðlar í Argentínu voru allt annað en ánægðir með tap sinna manna á móti Paragvæ í nótt. Það var ekki bara þjálfarinn Diego Maradona sem fékk að heyra það frá þeim því Lionel Messi var einnig harðlega gangrýndur fyrir frammistöðu sína.

Dagblaðið Diario Ole velti sem dæmi fyrir sér af hverju Lionel Messi spili alltaf svona illa með argentínska landsliðinu og sé í raun ekki sami leikmaður og þegar hann er að spila með spænsku Evrópumeisturunum.

„Messi er aðeins skugginn af sjálfum sér miðað við það hvernig hann spilar með Barcelona," skrifaði Diario Ole.

Diego Maradona reyndi að verja sinn mann. „Hann stóð sig vel en leikmenn Paragvæ og Martino þjálfari vissu vel hversu hættulegur hann er. Í hvert skipti sem hann fékk boltann voru tveir eða þrír menn að dekka hann," sagði Maradona.