Nýr verktaki á Lyngdalsheiði

Vegurinn milli Þingvalla og Laugarvatns er einhver fjölfarnasta ferðamannaleið landsins og því hafa margir beðið lengi eftir nýjum vegi um Lyngdalsheiði, og ekki síst íbúar og sumarhúsagestir í uppsveitum Árnessýslu sem fá margir þarna stystu leiðina til Reykjavíkur.

Klæðning hóf vegarlagninguna fyrir ári en gafst upp í vor þegar Lýsing lagði hald á vinnuvélarnar vegna vanskila. Óvissu sem síðan hefur ríkt um framhald verksins hefur nú verið eytt með því að nýr verktaki, A.Þ. vélaleiga, hefur tekið yfir verksamninginn og fengið Hlaðbæ-Colas sem undirverktaka.

Að sögn Gunnars Gunnarssonar aðstoðarvegamálastjóra óskaði Klæðning eftir þessari breytingu í samræmi við ákvæði ÍST 30, íslensks staðals, sem er hluti verksamnings, sem heimila aðilaskipti með samþykki verkkaupa, og féllst Vegagerðin á þá lausn. Klæðning var vel á undan áætlun þegar hún hætti og telur Vegagerðin því að áform um verklok eftir rúmt ár eigi að geta staðist.