Reiknar ekki með nýjum samningum

Engin ástæða er til að gefa sér að Íslendingar þurfi að fara í nýjar samningaviðræður vegna Icesave, sagði Steingrímur J. Sigfússon á Alþingi í gær. Hann vonar að svo fari ekki.

Steingrímur hafði fengið fyrirspurn frá Gunnari Braga Sveinssyni framsóknar­manni um hvort erlendir sérfræðingar yrðu fengnir í slíkar viðræður eða hvort nefnd undir stjórn Svavars Gestssonar yrði fengin aftur.

Steingrímur sagðist ekki vilja fara út í slíkar hugleiðingar og sagði að það væru ekki góð skilaboð að senda til útlanda, önnur en að unnið væri að lausn málsins. Hann áréttaði að nefnd Svavars hefði haft erlenda sérfræðinga sér til ráðgjafar.