Aldrei fleiri í Háskóla Íslands

Menntamál Heildarfjöldi nema í Háskóla Íslands í haust verður á sextánda þúsund. Aldrei hafa fleiri nemar verið skráðir í Háskóla Íslands frá upphafi. Um fjórtán þúsund stúdentar hafa þegar staðfest skólavist vegna náms við Háskóla Íslands á næsta misseri en á annað þúsund umsóknir eru enn í vinnslu. Umsóknum um nám í Háskólann fjölgaði um tuttugu prósent milli áranna 2008 og 2009.

Nýnemar í grunnnámi í haust verða um 3.700 og nýnemar í framhaldsnámi verða um 1.300. Heildar­fjöldi grunnnema í HÍ verður um 10.400 í haust og rösklega 3.400 í framhaldsnámi. Á sama tíma í fyrra hófu um 12.200 nemendur nám við HÍ. Um 400 verða í doktorsnámi í haust, sem er einnig mesti fjöldi sem hefur verið í slíku námi í HÍ frá upphafi.

Háskóli Íslands óx um fjórðung við sameiningu Háskólans og Kennaraháskóla Íslands 1. júlí í fyrra og svo um 10 prósent við inntöku nýnema um síðustu áramót. Athygli vekur að erlendum nemendum við HÍ fjölgar jafnt og þétt en yfir 700 erlendir stúdentar eru nú þegar skráðir í nám á næsta misseri.