Styrkja ferðasjóð langveikra barna

Ópal Sjávarfang, í samstarfi við verslanir sem selja laxinn þeirra og Icelandair, stendur um þessar mundir fyrir verkefninu „Gefðu með þér“ sem er tileinkað Vildarbörnum Icelandair – ferðasjóði langveikra barna.

Verslanirnar sem taka þátt bjóða til sölu 200 gramma hangi­reyktan lax frá Ópal. Af hverju laxaspjaldi, sem kostar 897 krónur, renna 300 krónur óskertar í sjóð Vildarbarna.

Sjóðurinn aðstoðar langveik börn og fjölskyldur þeirra við að stíga um stund út úr skugga óvissu og fjárhagsörðugleika, og brjóta upp hversdaginn, ferðast saman og búa til góðar minningar.

Árni Theodór fór í ferð til Orlando á vegum sjóðsins árið 2007: „Ferðin veitti okkur ómælda gleði. Með sameiginlegu átaki var tilgangi hennar náð, Árni Theodór var alsæll, og börnin öll reynslunni ríkari og fróðari. Það er ómetanlegt happ að hafa hlotnast þetta einstaka tækifæri,“ segir í frásögn sem fjölskylda hans skráði.

Fyrirtækin sem taka þátt í verkefninu eru: Auglýsingastofan Ennemm, Hagkaup, Kaskó, Krambúðin, Krónan, Melabúðin, Nettó, Nóatún, Rými, Samkaup, Svansprent, 10-11 og Vörumerking. - vsp