Stefáni líkt við Edgar Allan Poe

„Óneitanlega er gaman að vera líkt við Poe. Það hljómar vel. Ég hef alltaf verið Poe-maður,“ segir Stefán Máni rithöfundur.

Hið virta tímarit Spiegel tekur í hverri viku saman mikilverðustu bækur vikunnar. Í janúar kom Skipið eftir Stefán Mána út í þýskri þýðingu undir heitinu Das Schiff. Gagnrýnandi Der Spiegel velur bókina eina þá merkustu í þeirri viku og gefur henni auk þess lofsamlega umsögn þar sem Skipinu er líkt við verk Edgars Allans Poe og H.P. Lovecrafts.

Verk Poes sem þýski gagnrýnandinn vísar til er Arthur Gordon Pym og Stefán Máni segist reyndar ekki hafa lesið þá bók en hún sé skipabók og þannig skyld Skipinu. En viðbrög í Þýskalandi hafa verið einkar ánægjuleg. „Mikil og komu fljótt. Virkilega gaman en ég hef ekki heyrt enn af almennum viðtökum. Í kjölfar þessa hafði kvikmyndafyrirtæki í Berlín samband og spurðist fyrir um réttinn. Ég kom þeim í samband við ZikZak sem á kvikmyndaréttinn og vel má vera að eitthvað komi út úr því.“

Stefán Máni er þegar byrjaður á næstu bók. Tekur janúar fagnandi sem fyrir honum þýðir vinnufriður og til stendur að skila handriti inn næsta haust. „Já, og nei. Meira – nei,“ svarar Stefán, spurður hvort hún sverji sig í ætt við Ódáðahraun, síðustu bók hans. „Hún var harðkjarnakrimmi. Næsta bók er mýkri og aðalpersónan venjulegur strákur en ekki harðhaus. Kannski meira í líkingu við bækurnar Hótel California og Ísrael en þó eru þarna dularfull mál í bland. Venjulegur strákur lendir í miklum ævintýrum. Ég er ofboðslega spenntur fyrir þessari bók sem gengur vel.“ - jbg