Stefán Eiríksson: Notum könnunina til að peppa menn upp

„Við reynum að nýta þetta til þess að peppa menn upp og hrósa starfsfólki fyrir vel unnin störf," segir Stefán Eiríksson, lögreglustjóri á höfuðborgarsvæðinu, um nýja skoðanakönnun MMR en samkvæmt henni nýtur lögreglan afgerandi trausts. Stefán segist vera afskaplega ánægður með niðurstöðuna. Um land allt hafi lögreglan verið að ná afar góðum árangri. „Lögregla er í góðum tengslum við fólkið í landinu og sinnir ýmsum verkefnum sem eru ekki alltaf á síðum blaðanna eða í vefmiðlunum," segir lögreglustjórinn.

Skoðanakönnun MMR fór fram dagana 9. til 14. september. Í desember 2008 sögðu 75,7 prósent bera mikið traust til lögreglu og 76,9 prósent í maí síðastliðnum. Samkvæmt nýrri könnun bera nú 80,9 prósent landsmanna mikið traust til lögreglumanna.

„Ég var rétt í þessu að senda á alla mína starfsmenn upplýsingar um þessa könnun. Að mínu mati sýnir niðurstaðan með afgerandi hætti það góða starf sem starfsmenn embættisins og lögreglumenn í öllu landinu eru að vinna," segir Stefán.

Lögreglustjórinn segist aðspurður hafa skynjað mikinn stuðning við aðgerðir lögreglu í kjölfar átaka sem brutust út eftir bankahrunið fyrir ári síðan. „Það er alveg skýrt og afdráttarlaust að mínu mati að meginþorri almennings var sáttur með framgöngu lögreglu þar. Ég held að það sé ekki bara það sem skýrir þetta því lögreglan um land allt er að ná árangri á mjög mörgum sviðum."

Stefán telur að niðurstaða eins og þessi sé góð fyrir vinnuandann innan lögreglunnar og um leið hvatning til allra sem þar starfa.

Traust til lögreglu hafi aukist jafnt og þétt frá því í desember og segir Stefán könnuna sýna að það sé alltaf hægt að gera betur. „Við ætlum að leggja okkur fram við það hér eftir sem hingað til. Við vöknum á hverjum morgni með það að markmiði að gera betur en í dag en í gær."