Capello: Gerrard aldrei betri

Fabio Capello landsliðsþjálfari Englands segir að Steven Gerrard hafi aldrei verið betri en einmitt nú.

Sparkspekingar víða um heim hafa keppst við að hlaða lofi á Gerrard enda hefur hann átt frábæru gengi að fagna sem vann til að mynda Real Madrid og Manchester United í sömu vikunni og það með samanlögðu markatölunni 8-1.

Gerrard hefur verið að spila á milli sóknar og miðju hjá Liverpool en mun líklega spila vinstra megin á miðjunni með enska landsliðinu gegn Slóvakíu í dag.

„Zidane sagði að Gerrard væri einn sá besti í heiminum í dag og ég verð að vera sammála honum," sagði Capello í samtali við enska fjölmiðla.

„Hann hefur verið frábær og hefur aldrei verið betri."

Capello minntist á að hann lét Gerrard spila á milli sóknar og miðju í leik gegn Frökkum í fyrra og fannst mörgum það furðulegt.

„Nú er Steven Gerrard að standa sig vel í álíka hlutverki hjá Liverpool og nú er ég spurður af hverju hann er ekki að spila í þeirri stöðu með landsliðinu nú. Ég þakka kærlega fyrir stuðninginn á þeim tíma."

„Síðast þegar hann spilaði, gegn Hvíta-Rússlandi í október, skoraði hann eitt mark og lék mjög vel. Ekki veit ég af hverju það var ekki rætt um stöðu hans á vellinum þá."