Fékk treyju Ballack fyrir tíu ára frænda sinn

Aron Einar Gunnarsson átti fínan leik en varð að sætta sig við tap er Coventry tapaði fyrir Chelsea í fjórðungsúrslitum ensku bikarkeppninnar.

„Auðvitað var svekkjandi að detta út úr bikarkeppnini. En ég verð þó að segja að við gerðum eins og við gátum. Við spiluðum ágætlega en þetta var jú Chelsea. Við erum því nokkuð sáttir," sagði Aron í samtali við Vísi eftir leik í gær.

„Það var við því að búast að við myndum ekki vera mikið við boltann. En svo þegar við fengum boltann töpuðum við honum allt of fljótt. Það var það sem fór með okkur - við vorum stöðugt að elta þá. Ég veit ekki hvað ég hljóp mikið í leiknum en það var alveg nóg. Ég er þreyttur en sáttur."

Coventry náði góðum árangri í bikarkeppninni og lagði til að mynda Blackburn á leið sinni í fjórðungsúrslitin.

„Það var frábær árangur og ég myndi segja að það hafi líka haft áhrif á gengi okkar í deildinni. Við fengum meira sjálfstraust eftir þann sigur og höfum verið á góðum spretti í deildinni."

Hann segir það ekki ómögulegt fyrir Coventry að komast í aukakeppni deildarinnar um eitt laust sæti í úrvalsdeildinni þó svo að liðið sé í fjórtánda sæti deildarinnar. Liðið er þó ekki nema níu stigum á eftir Preston sem er í sjötta sætinu. Liðin í 3.-6. sæti taka þátt í aukakeppninni.

„Þetta er þéttur pakki og það hafa allir verið að vinna alla í þessari deild."

Hann segir að það hafi verið gaman að takast á við stórstjörnur Chelsea í leiknum í gær.

„Inn á vellinum var þetta eins og kannski í mörgum öðrum leikjum. Maður tók ekki eftir því fyrr en eftir leik hvers konar stórstjörnur þarna voru á ferð. Þeir voru með lífverði fyrir utan búningsklefann og stuðningsmenn Coventry biðu eftir þeim eftir leik en ekki okkur," sagði hann í léttum dúr. „Maður gerir sér engan vegin grein fyrir því fyrirfram hversu stórt batterí þetta er."

Fyrir leik fékk hann skilaboð frá Fannari, tíu ára frænda sínum, og varð hann við þeim.

„Ég átti að fá treyju einhvers leikmanna Chelsea og fékk treyjuna frá Ballack. Hann tók það fram að það skipti hann engu máli frá hverjum treyjan ætti að koma nema að það voru tveir á algerum bannlista. Ég ætla þó ekki að segja hverjir þeir eru," sagði hann og hló.