Þór Saari og Birgitta taka upp hanskann fyrir Margréti

Þór Saari og Birgitta Jónsdóttir, þingmenn Borgarahreyfingarinnar, koma Margréti Tryggvadóttur samflokkskonu sinni til varnar í fréttatilkynningu sem þau sendu fjölmiðlum í dag. Segja þau það af og frá að Margrét stundi einhverja rógsherferð gegn Þráni Bertelssyni eða að henni gangi eitthvað illt til og þeir sem þekki hana viti að vart sé að finna heiðarlegri, heilsteyptari og hugulsamari manneskju en Margréti.

Málið á rætur sínar að rekja til þess að í tölvupósti sem Margrét sendi á varamann Þráins Bertelssonar segist hún hafa áhyggjur af heilsufari hans. Af bréfinu má skilja að hún telji að Þráinn hafi verið þunglyndur í sumar og sé með alzheimer er byrjunarstigi.

Þá hefur sáttanefnd Borgarahreyfingarinnar sem átti að taka á þeim ágreiningi sem er innan Borgarahreyfingarinnar sent frá sér yfirlýsingu þar sem nefndin harmar að sjá á eftir því góða fólki sem nú hefur sagt sig úr hreyfingunni en hvetur það, og þá sem eftir eru í hreyfingunni að einbeita sér að framgangi þeirra stefnumála sem sátt var um við stofnun Borgarahreyfingarinnar.