Samþykktu 48 milljóna króna aukafjárveitingu til framhaldsskóla

Ríkisstjórnin samþykkti á fundi sínum í morgun að leggja til við Alþingi 48 milljóna króna aukafjárveitingu á fjáraukalögum til að ljúka við innritun nemenda yngri en 18 ára í framhaldsskóla.

Í tilkynningu frá menntamálaráðuneytinu segir að óvenju mikil aðsókn sé í framhaldsskóla landsins. Í byrjun ágúst hafi verið ljóst að ríflega 100 nemendur yngri en 18 ára kæmust ekki inn í framhaldsskólana, þrátt fyrir ákvæði um fræðsluskyldu, nema gripið yrði til sérstakra aðgerða.

„Að undanförnu hefur verið unnið að því í menntamálaráðuneytinu að skapa námsúrræði fyrir þessa nemendur. Niðurstaðan er sú að 48 milljónir vanti upp á til að geta tryggt nemendunum viðunandi úrræði. Leitað hefur verið eftir samstarfi við nokkra framhaldsskóla og Námsflokka Reykjavíkur um að veita nemendum skólavist við hæfi," segir í tilkynningunni.