Zat Knight og Ricketts til Bolton

Bolton Wanderers hefur keypt varnarmennina Zat Knight frá Aston Villa og Sam Ricketts frá Hull City. Báðir hafa þeir skrifað undir samning til þriggja ára.

Þar með hefur Gary Megson, stjóri Bolton, fengið fjóra leikmenn í sumar. Áður hafði hann krækt í Sean Davis frá Portsmouth og varnarmanninn Paul Robinson frá West Brom en Robinson kemur á lánssamningi í eitt ár.

Knight er 29 ára miðvörður sem á að baki landsleiki fyrir England. Aston Villa keypti Knight frá Fulham 2007 en lék aðeins 13 leiki í úrvalsdeildinni á síðasta tímabili. Ricketts er 27 ára bakvörður sem á 34 landsleiki fyrir Wales.

Bolton er einnig nálægt því að fá Lee Chung-Yong frá Suður-Kóreu en beðið er eftir atvinnuleyfi fyrir hann.