Forræðisdeila: Heldur til Bandaríkjanna í dag

Borghildur Guðmundsdóttir, sem hefur verið gert að fara til Bandaríkjanna með syni sína tvo, heldur af stað með þá til Bandaríkjanna í dag. Hún mun eiga fund strax á mánudaginn með lögfræðingi sem hún hefur fengið þar í landi.

Borghildur var gift bandarískum hermanni sem vill höfða forræðis­mál á hendur henni í Bandaríkjunum. Héraðsdómur Reykjaness úrskurðaði að hún hefði ekki mátt fara með börnin til Íslands án leyfis fyrrverandi manns síns, þar sem lögskilnaður hafði ekki gengið í gegn. Hún skyldi því fara utan innan sex vikna, sem eru liðnar á morgun. Hæstiréttur staðfesti svo þann úrskurð.

Þar sem hún hefur hvorki dvalar- né atvinnuleyfi í Bandaríkjunum mun hún aðeins geta dvalist þar í þrjá mánuði. Líklegt er hins vegar að forræðismál muni taka lengri tíma en það, og þá er viðbúið að hún þurfi að skilja syni sína eftir hjá föður þeirra, sem þeir hafa ekki hitt í hálft annað ár. Hún segir yngri drenginn, sem er á fimmta ári, hvorki muna eftir föður sínum né tala ensku lengur.