Lögreglustjóri vísar orðum Sveins Andra á bug

Sigríður Björk Guðjónsdóttir, lögreglustjóri á Suðurnesjum, hafnar alfarið atvikalýsingu Sveins Andra Sveinssonar, lögmanns, á handtöku eiginkonu Íslendings sem er í haldi vegna mansalsmálsins, svonefnda. Lögreglustjórinn segir að konan hafi verið ósamvinnuþýð og neitað að gefa upplýsingar sem óskað var eftir. Því hafi verið ákveðið að handtaka hana og færa til yfirheyrslu.

Sveinn Andri sagði í hádegisfréttum Bylgjunnar að konan sé í miklu áfall og ekki verði við það unað hvaða meðferð hún fékk. Að hans sögn ruddust 30 lögreglumenn í skotheldum vestum inn á heimili hjónanna og tvö börn hafi fylgst með. Hann óskaði eftir opinberlegi afsökunarbeiðni vegna þessa.

Í yfirlýsingu frá Sigríði segir að í aðgerðum sínum hefur lögreglan að leiðarljósi að ganga ekki harðar fram en þörf sé á við framkvæmd starfa sinna og gæti þess sérstaklega þegar börn eiga í hlut á vettvangi.

Í umræddu tilviki hafi fimm óeinkennisklæddir lögreglumenn farið að húsi hjónanna og hitt eiginuna fyrir utan húsið ásamt tveimur börnum hennar. „Lögreglan kynnti konunni fyrirhugaðar aðgerðir. Konan fékk að hringja í móður sína og síðan í vinkonu sína sem hún bað um að sækja börnin. Eldra barnið, telpa, fór á brott með vinkonu sinni og var það með vitund og vilja móðurinnar," segir lögreglustjórinn.

Þá segir Sigríður að eiginmaður konunnar hafi komið heim og verið mjög æstur og dónalegur við lögreglumenn og sýnt þá hegðun að syni sínum ásjáandi. „Maðurinn var síðan handtekinn í húsinu vegna hegðunar sinnar og færður í handjárn. Hvorugt barnið varð vitni að þeirri aðgerð né þegar maðurinn var fluttur á brott af heimilinu af tveimur einkennisklæddum lögreglumönnum." Því næst hafi kona komið á vettvang og tekið drenginn á brott með sér að ósk móðurinnar. Í framhaldinu hafi húsleit vverið gerð á heimilinu að konunni og lögmanni viðstöddum.

Alls tóku 13 óeinkennisklæddir lögreglumenn þátt í aðgerðinni auk tveggja einkennisklæddra sem færðu hinn handtekna á brott. Þessir lögreglumenn voru ekki allir á vettvangi á sama tíma, að sögn Sigríðar.

„Meðan á aðgerðinni stóð var konan ósamvinnuþýð og neitaði að gefa upplýsingar sem óskað var eftir. Ákveðið var að handtaka hana og færa til yfirheyrslu," segir lögreglustjórinn. „Engri valdbeitingu var beitt við handtöku konunnar og var hún færð í fangageymslu eftir að húsleit lauk en aðgerðin stóð í um 4 klukkustundir."

„Með hliðsjón af framangreindu er atvikaalýsingu Sveins Andra Sveinssonar, lögmanns, alfarið hafnað," segir að lokum í yfirlýsingu Sigríðar.