Verður Hiddink áfram hjá Chelsea?

Guus Hiddink, settur knattspyrnustjóri Chelsea, hefur gefið það upp að ákvæði í samningi hans geri honum kleift að snúa aftur til Chelsea í nóvember ef rússneska landsliðið kemst ekki á HM 2010.

Hiddink er sem kunnugt er landsliðsþjálfari Rússa en var fenginn til að stýra Chelsea út leiktíðina eftir að Luiz Scolari var rekinn.

Hiddink hefur legið undir nokkrum þrýstingi um að taka við enska liðinu að fullu og nú virðist það ekki útilokað eftir allt saman.

"Ég mun einbeita mér að rússneska liðinu eftir að þessu verkefni lýkur, en fólk hefur beðið mig að íhuga að vera hér áfram. Ég nýt mín vel í Rússlandi en ég er með ákvæði í samningi mínum sem segir að ég geti látið af störfum í nóvember ef við komumst ekki á HM," sagði Hiddink.

Rússarnir eru í öðru sæti í fjórða riðli undankeppninnar þar sem þeir eru fjórum stigum á eftir toppliði Þjóðverja og eiga leik til góða. Næstu leikir Rússa í keppninni eru gegn Azerum og Liechtenstein.

Níu riðlar eru í Evrópuhluta undankeppni HM. Þær níu þjóðir sem hafna í efsta sæti komast beint á HM en þær átta þjóðir sem ná bestum árangri í öðru sæti riðla sinna komast í umspil.