Átta leikir og búið

Alan Shearer, nýráðinn stjóri Newcastle, segir ekki koma til greina að stýra liðinu lengur en í þá átta leiki sem eftir eru ef leiktíðinni. Takmarkið sé að halda liðinu uppi - ekkert annað.

"Ég vil halda þessu liði uppi og svo geta menn ákveðið hvað gerist í framhaldinu. Þetta snýst ekki um mig. Þetta snýst um að halda Newcastle í úrvalsdeildinni. Ég mun gera mitt besta og nú er þetta undir leikmönnum liðsins komið - þeir fá allir að byrja með hreint borð," sagði Shearer, sem aldrei hefur komið nálægt knattspyrnustjórn áður.

"Ég mun gera mín mistök, það er á hreynu. En ég er með mann með mér (Ian Dowie, aðstoðarstjóra) sem hefur kjark í að segja mér það þegar að því kemur. Ég elska þetta félag og það verður að halda sæti sínu í deildinni," sagði þessi mikli markaskorari á blaðamannafundi í dag.