Guðjón lagði mig í einelti

Michael O'Connor, leikmaður Crewe, segir að Guðjón Þórðarson knattspyrnustjóri liðsins hafi lagt sig í einelti strax frá fyrsta degi sínum hjá félaginu.

O'Connor er nú í láni hjá Lincoln City í ensku C-deildinni þar sem Crewe leikur einnig.

Guðjón ákvað að vísa honum úr liði Crewe eftir atvik sem átti sér stað á ferðalagi liðsins til Brighton um síðustu helgi. Ýmsar sögusagnir hafa gengið um hvað hafi átt sér stað á ferðalaginu en O'Connor vildi ekki svara þeim í samtali við enska fjölmiðla.

„Þetta eru allt lygar. Guðjóni líkar ekki við mig. Ég var hjá Crewe í níu ár og lenti aldrei í neinum vandræðum. Hann lagði mig í einelti og sagði mér að hann ætlaði gera mig að fordæmi fyrir aðra leikmenn."

O'Connor á enn eitt ár eftir af samningi sínum við félagið og segist vilja spila aftur fyrir það.

„Ég vil spila aftur með Crewe en ekki fyrir þennan knattspyrnustjóra."