Það voru mistök hjá mér að fara á HM

Michael Owen hefur viðurkennt að hann hefði átt að sleppa HM 2006 í Þýskalandi og reyna þess í stað að ná sér að fullu fyrir tímabilið með Newcastle. Owen meiddist enn einu sinni um helgina.

Owen sem er orðinn 29 ára gamall tognaði á ökkla í 1-1 jafntefli Newcastle á móti Hull í ensku úrvalsdeidinni á laugardaginn. Hann hefur glímt við hver meiðslin á fætur öðru og þau örlagaríkustu voru á HM og kostuðu hann ársfjarveru frá fótboltanum.

Owen kom aftur inn í enska landsliðið skömmu fyrir heimsmeistaramótið á Þýskalandi fyrir tæpum þremur árum eftir að hafa fótbrotnað á tímabilinu. Hann sleit krossbönd í leik gegn Svíum á HM og hefur glímt við meiðsli allar götur síðan.

„Ef menn skoða tíma minn hjá Newcastle þá sjá menn að öll vandræðin hófust þegar Paul Robinson lenti á fætinum mínum í leik á móti Tottenham. Margir lenda í því að brjóta bein í fæti en þau eru sjaldan eins slæm og hjá mér.

Enginn hefði getað sloppið við brot við þessar aðstæður," sagði Owen í viðtali við Newcastle Journal. Owen fótbrotnaði þegar markvörður Tottenham lenti á honum á gamlársdegi 2005.

„Ég setti allt á fullt til að ná að spila með Englandi á HM og náði aðeins hálfum leik með Newcastle," sagði Owen sem sagði ekki hafa áttað sig á því að fóturinn hafði misst mikinn styrk á meðan hann var í gifsi.

„Það er auðvelt að segja það núna að ég hefði átt að sleppa HM en ef ég fengi annað tækifæri þá færi ég örugglega aftur með því þetta var HM," sagði Owen.