Stjórnarformaður OR fordæmir árásir hugleysingja

Guðlaugur G. Sverrisson, stjórnarformaður Orkuveitu Reykjavíkur skrifar harðorða grein í Morgunblaðið þar sem hann fordæmir árásir á heimili fjölskyldna stjórnenda í orku- og stóriðjufyrirtækjum.

„Þær er ekki hægt að réttlæta," segir Guðlaugur. „Þær eru löglausar og siðlausar."

Hann segir að þrátt fyrir að skoðanaskipti um uppbyggingu orkufreks iðnaðar hafi oft verið hvöss, jafnvel harðvítug, hafi þau þó yfirleitt verið málefnaleg.

Hins vegar eigi enginn skilið að geta ekki sofið í skjóli heimilis síns án þess að eiga á hættu að við húsvegginn sé einhver á ferli skvettandi sýru.

„Á heimilum okkar býr fólk sem lítið hefur með stefnu í auðlinda og atvinnumálum að gera. Makar okkar fást við margskonar störf og börnin okkar bera ekki ábyrgð á verkum okkar í vinnutímanum. Engu að síður mega þau liggja undir árásum hugleysingja að næturþeli," segir Guðlaugur.

Hann segir árásirnar bera þess vitni að siðferðilegir brestir leynist víðar en við hugðum.

Í niðurlagi greinarinnar segir hann hafa tekist bærilega að halda uppi lögum og reglu í góðærinu. Prófsteinninn á okkur sé hins vegar hvernig okkur tekst til þegar harðnar á dalnum.