63 mínútum frá heimsmeti

Edwin van der Sar, markvörður Manchester United, er aðeins 63 mínútum frá því að setja heimsmet. Þessi 38 ára leikmaður hefur ekki fengið á sig mark í ensku úrvalsdeildinni síðan United tapaði fyrir Arsenal í byrjun nóvember.

Um helgina bætti hann breskt met þegar United vann 1-0 útisigur á West Ham. Næsti deildarleikur er gegn Fulham, fyrrum félagi Van der Sar, og er ljóst að heimsmet verður sett ef United fær ekki á sig mark fyrstu 63 mínútur leiksins. Abel Resino á núgildandi met sem hann setti á sínum tíma með Atletico Madrid í spænsku deildinni.

„Ég er í sannleika sagt orðinn nokkuð leiður á umtalinu um öll þessi met. Kannski mun ég hleypa inn einu eða tveimur mörkum í næsta leik," sagði Van der Sar í gríni en hann hefur haldið hreinu í 1.212 mínútur í deildinni.

„Það er alltaf gaman að setja met en þetta met verður ekki verðmætt fyrr en þegar tímabilinu lýkur. Við stefnum á að verja Englandsmeistaratitilinn og fögnum þessu meti ekki nema ef það tekst," sagði Van der Sar og ítrekaði það að hann ætti ekki allan heiðurinn af þessum árangri heldur varnarvinna liðsins í heild.