Íslendingar eru ekki aflögufærir

Íslendingar eru „lens í fjárframlögum" til verkefna Vestnorræna ráðsins, segir Atli Gíslason þingmaður, en hann sat ársfund Vestnorræna ráðsins, sem lauk í Færeyjum á föstudag.

Atli var spurður hvort efnahagshrunið hefði borið á góma hjá ráðinu, og sagði hann það hafa verið með óbeinum hætti. „Við erum ekki eins aflögufær til verkefna og við vorum áður." Á fundinum var rætt um ýmis sameiginleg hagsmunamál þjóðanna sem mynda ráðið: Færeyja, Grænlands og Íslands.

Sérstaklega nefnir Atli sjávarútvegsmál, en hann ræddi við færeyska sjávarútvegsráðherrann um færeyska fiskveiðistjórnunar­kerfið. Atli segir að mikið megi læra af færeyskum fiskveiðum; þar þekkist brottkast til að mynda ekki.

Ákveðið var að halda ráðstefnu um kerfi þjóðanna í Stykkishólmi að ári.

Einnig var rætt um Hoyvíkursamninginn, fríverslunarsamning Íslands og Færeyja, og um hvort Grænlendingar tækju þátt í honum. Ekkert var ákveðið um það að sinni.

„Sá samningur gengur afar vel," segir Atli. Færeyingar hafi þó áhyggjur af framtíð hans ef af aðild Íslands að ESB verður. - kóþ