Umfjöllun: Ísland spilaði í 45 mínútur

Leikur íslenska landsliðsins gegn Slóvökum á Laugardalsvelli í kvöld var eins og svart og hvítt. Lokatölur 1-1.

Fyrri hálfleikur hjá íslenska liðinu var hreinasta hörmung og leikmönnum liðsins til skammar. Þeir voru ekki mættir til leiks, nenntu ekki að berjast né hlaupa eins og menn.

Var átakanlegt að fylgjast með and- og áhugaleysi leikmanna. Maður spurði sig að því til hvers þessir menn voru yfir höfuð mættir í þennan leik?

Gunnleifur bjargaði liðinu vel í tvígang en réð ekki við þrumufleyg Robert Vittek. Slóvakar því marki yfir í hálfleik.

Leikur íslenska liðsins gat ekki versnað í síðari hálfleik. Sem betur fer girtu menn sig í brók í síðari hálfleik og fóru að spila fótbolta eins og menn.

Íslenska liðið var talsvert betri aðilinn og uppskar sanngjarnt jöfnunarmark á 59. mínútu. Þá stangaði Kristján Örn Sigurðsson boltann í netið eftir góða hornspynu Pálma Rafns.

Þrátt fyrir ágæta tilburði það sem eftir lifði leiks náði íslenska liðið ekki að skora annað mark. Að sama skapi var liðið heppið að tapa ekki leiknum þegar Brynjar Björn gaf Slóvökum boltann og um leið dauðafæri sem þeir glutruðu á ótrúlegan hátt.

Jafntefli niðurstaðan í leik sem Ísland spilaði aðeins í 45 mínútur en slapp samt með jafntefli. Meira átti liðið ekki skilið og það getur í raun þakkað Gunnleifi fyrir að hafa ekki tapað leiknum.

Ísland-Slóvakía  1-1

0-1 Robert Vittek (35.)

1-1 Kristján Örn Sigurðsson (59.)

Áhorfendur: 5.099

Dómari: Lars Christoffersen 7.

Skot (á mark): 10-12 (4-6)

Varin skot: Gunnleifur 5 – Jan 3

Horn: 6-7

Aukaspyrnur fengnar: 9-10

Rangstöður: 5-3

Nánari umfjöllun og einkunnagjöf leikmanna má finna í Fréttablaði morgundagsins.