Ólafur: Svöruðum kallinu ágætlega

Ólafur Jóhannesson þjálfari íslenska landsliðsins var nokkuð sáttur eftir leik liðsins gegn Slóvökum og sagði að liðið hefði verið nær sigri en það slóvenska.

"Mér fannst við spila vel í dag, ná jafntefli gegn sterkri þjóð og vera jafnvel nær því að vinna heldur en þeir. Heilt yfir er ég mjög sáttur," sagði Ólafur í samtali við Vísi að leik loknum.

Ólafur minnist á að liðið hefði lent í töluverðum vandræðum fyrir leikinn og misst mikilvæga leikmenn úr liðinu. Meðal annars þurfti hann að færa Brynjar Björn Gunnarsson niður í vörnina í seinni hálfleik, en Brynjar leikur oftast á miðjunni.

"Við missum þrjá hafsenta úr liðinu af þeim sem voru valdir, þá Hermann, Ragnar og svo Sölva. Brynjar hefur spilað þessa stöðu, bæði með landsliði og sínu félagsliði. Hann er auðvitað afburða fótboltamaður og kann þessa stöðu út og inn. Þannig að ég var ekkert hræddur við það ef þessi staða kæmi upp og ég var búinn að minnast á það við hann í hálfleik að þetta gæti vel gerst," sagði Ólafur.

Nú eru sumir leikmenn að klára sín undirbúningstímabil með félagsliðum sínum og sagði Ólafur að það hefði einhver áhrif á liðið.

"Það hefur oft reynst erfitt að gíra menn upp á þessum tíma, í miðjum undirbúningi fyrir tímabilið. En við vorum komnir svolítið upp við vegg þar sem okkur hafði ekki gengið sérlega vel undanfarið. Við töluðum einmitt um það fyrir leikinn að eini möguleikinn á að breyta því væri inni á vellinum og ég held að við höfum svarað því kalli ágætlega í kvöld," sagði landsliðsþjálfarinn Ólafur Jóhannesson.