Sir Alex: Tapið á móti Liverpool mun hjálpa okkur

Alex Ferguson, stjóri Manchester United, segir að sitt lið muni læra af skellinum á móti Liverpool um síðustu helgi og það muni hjálpa liðinu í að koma sér aftur á skrið.

Manchester United mætir Fulham á morgun og Ferguson boðar að liðið hans sýni sínar bestu hliðar á ný í þeim leik.

„Við vorum búnir að hlusta á stanslaust hrós í margar vikur og allir voru að tala um hversu frábært liðið okkar væri. Ég missti mig aldrei í velgengninni og ég vona að enginn annar í mínu liði hafi gert það," segir Sir Alex Ferguson og bætir við.

„Það finnst samt öllum gaman að lesa góða hluti um sig í blöðunum og þá sérstaklega ungu leikmönnunum."

Ferguson taldi úrslitin á móti Liverpool ekki gefa rétta mynd af leiknum en hans menn gerðu sig seka um ítrekuð risamistök.

„Það er erfitt að verja 1-4 tap og það þarf að finna ástæðurnar fyrir því að tapa svona stórt. Ég held að við höfum boðið upp á þetta tap sjálfir því leikmenn voru að gera mistök sem ég býst ekki við að þeir geri," sagði Ferguson.

Skotinn snjalli ætlar að nota tapið á móti Liverpool til þess að koma sínum mönnum aftur upp á tærnar.

„Þetta tap á að geta hjálpað okkur. Mínir menn átta sig á því að það kostar mikla vinnu að verða enskur meistari og liðið þarf að skila henni aftur og aftur," sagði Sir Alex.