Gautaborg styrkti stöðu sína í toppbaráttunni í Svíþjóð

Þrír leikir fóru fram í sænsku úrvalsdeildinni í kvöld þar sem Íslendingaliðið Gautaborg vann góðan 0-3 sigur gegn Brommapojkarna og styrkti þar með stöðu sína í toppbaráttunni.

Hjálmar Jónsson og Ragnar Sigurðsson léku allan leikinn í miðju varnar Gautaborgar en Theódór Elmar Bjarnason var ekki í leikmannahópunum að þessu sinni.

Eyjólfur Héðinsson og Hallgrímur Jónasson léku allan leikinn með GAIS í 1-1 jafntefli gegn Malmö en Guðmundur Reynir Gunnarsson og Guðjón Baldvinsson voru ekki í leikmannahópunum hjá GAIS. Eyjólfur lagði upp mark GAIS í leiknum.

Þá var Jónas Guðni Sævarsson í byrjunarliði Halmstad í 2-1 tapi gegn Örebro en var skipt af velli á 75. mínútu.