Sögufrægt herskip fundið á botni Faxaflóa

Staðfesting fékkst á því í dag að skipsflak á botni Faxaflóa, sem neðansjávarmyndir náðust af á mánudag, er sögufrægt bandarískt herskip, sem þýskur kafbátur sökkti í seinni heimstyrjöld. Gat eftir tundurskeyti sést greinilega á skipsskrokknum.

26 manns fórust en 187 björguðust þegar þýskur kafbátur skaut strandgæsluskipið Alexander Hamilton á kaf í janúarmánuði árið 1942. Í dag var staðfest að flak skipsins er fundið á 90 metra dýpi í miðjum Faxaflóa. Þessi niðurstaða fékkst þegar neðansjávarmyndir af skipsskrúfunum voru bornar saman við gögn sem bárust frá bandarísku strandgæslunni í dag. Neðansjávarmyndavél Árna Kópssonar og fjarstýrður kafbátur Hafmyndar Gavia voru notuð til að mynda flakið í leiðangri Landhelgisgæslunnar á mánudag. Starfsmenn Gæslunnar hafa síðan rannsakað myndirnar og meðal annars fundið þetta gat, sem þeir telja að sé eftir þýska tundurskeytið sem grandaði herskipinu, sem reyndist sögulegur atburður í stríðsátökunum.

Georg Lárusson, forstjóri Landhelgisgæslunnar, segir að Alexander Hamilton sé líkast til fyrsta skip sem Bandaríkjamenn missa eftir árásina á Pearl Harbour, þegar þeir ákváðu að blanda sér af fullum þunga í seinni heimstyrjöldina. Þetta sé því býsna merkilegur fundur. Þótt lengi hafi verið vitað af þessu skipi og að því hafi verið sökkt hafa menn ekki vitað fyrr en nú hvar það liggur.

Það var áhöfn nýju flugvélar Landhelgisgæslunnar, TF-SIF, sem sá olíuleka á bletti á Faxaflóa, sem Georg segir stórmerkilegt mál. Þótt olíulekinn væri lítill tókst að greina hann með tækjum Gæsluvélarinnar í júlíbyrjun en sjómælingabáturinn Baldur staðfesti síðar að þarna væri skipsflak.

Á myndunum má meðal annars sjá fallbyssur skipsins en fjölskrúðugt fiskalíf við skipið hefur ekki síður vakið athygli Gæslumanna. Áformað er að kanna betur olíulekann og segir Georg að Umhverfisstofnun muni væntanlega skoða hvort það sé alvarlegt mál eða ekki. Líklegast sé þetta þó lítill leki sem hafi verið lengi. Það sé engu að síður mjög gagnlegt að fá þessar upplýsingar um lekann og einnig um flakið sem þarna liggur á hafsbotni.