Óvíst með þátttöku Wright-Phillips

Ólíklegt þykir að Shaun Wright-Phllips geti spilað með enska landsliðinu í vináttuleiknum gegn Slóvakíu á Wembley á morgun.

Wright-Phillips hefur ekkert getað æft með landsliðinu í vikunni vegna ökklameiðsla. Búist er við því að Fabio Capello landsliðsþjálfari muni annað hvort tefla fram David Beckham eða Aaron Lennon á hægri kantinum í hans stað.

En jafnvel þótt Beckham verði ekki í byrjunarliðinu verður að teljast afar líklegt að hann muni koma við sögu og spila þar með sinn 109. landsleik. Enginn útileikmaður hefur náð því markmiði með enska landsliðinu.

Peter Crouch æfði með liðinu í dag en hann missti af æfingum fyrr í vikunni vegna meiðsla í kálfa sem hann varð fyrir í leik Portsmouth og Everton um síðustu helgi.