Peter Crouch kominn til Tottenham - Darren Bent á förum til Sunderland

Það var stór dagur á leikmannamarkaðnum í gær þegar Tottenham tryggði sér þjónustu Peter Crouch frá Portsmouth á 9-10 milljónir punda og virðist um leið hafa selt Darren Bent til Sunderland á 15 milljónir punda.

Daily Mirror gengur reyndar svo langt með að segja að Tottenham hafi verið svo viljugt að selja Bent eftir að hafa klófest Crouch að leikmaðurinn var vinsamlegast beðinn um að yfirgefa flugvél á Heathrow-flugvellinum sem var á leiðinni í æfingarmót í Kína til þess að fara til viðræðna við Sunderland.

Bent hefur reyndar aldrei náð hæstu hæðum með Lundúnafélaginu eftir 18,5 milljón punda félagsskiptin frá Charlton en Sunderland mun vera tilbúið að bjóða honum fimm ára samning og möguleikann á finna fæturna að nýju.