City tapaði úrslitaleiknum fyrir Kaizer Chiefs

Hið rándýra lið Manchester City lauk æfingaferð sinni í Suður-Afríku með því að leika við heimamenn í Kaizer Chiefs í úrslitaleik Vodacom-bikarsins. Manchester United vann þetta æfingamót í fyrra.

En Vodacom-bikarinn helst ekki í Manchester þar sem City tapaði leiknum í dag 1-0. Eina mark leiksins kom í fyrri hálfleik.

Gareth Barry var besti leikmaður City í þessum leik en það voru heimamenn sem náðu fram hefndum eftir að hafa tapað þegar þessi sömu lið mættust fyrr í vikunni. Kaizer Chiefs er því Vodacom-meistari en leikmenn liðsins fögnuðu sigrinum vel.

Lið Manchester City í dag: Given, Vidal (Ben Haim 16), Dunne (Zabaleta 36), Onuoha (Weiss 73), Bridge, Barry, de Jong, Wright-Phillips, Petrov (Robinho 58), Bellamy, Adebayor.