Winslet var stjarna kvöldsins

Kate Winslet var stjarna 66. Golden Globe-verðlaunahátíðarinnar en hún fór heim til Bretlands með tvær styttur. Sjónvarpsþátturinn 30 Rock stal senunni í sjónvarpsflokkunum.

„Er þetta virkilega að gerast, þetta á ekki að vera hægt," voru orð Kate Winslet þegar hún tók við seinni verðlaunastyttunni sinni sem besta leikkona ársins. Gestir Beverly Hilton-hótelsins trúðu varla sínum eigin augum og réðu sér tæpast fyrir kæti þegar í ljós kom að nafn Winslet hafði komið upp úr umslaginu. Annars vegar var Winslet verðlaunuð fyrir leik sinn í kvikmyndinni The Revolutionary Road eftir Sam Mendes og hins vegar fyrir aukahlutverk í kvikmyndinni The Reader. Landi Winslet, Danny Boyle, getur einnig vel við unað því kvikmynd hans, Slumdog Millionaire, var valin besta myndin og Boyle kjörinn besti leikstjórinn. Golden Globe-verðlaunin þykja ágætis vísbending um hvað koma skal á Óskarnum og Bretar geta í það minnsta hlakkað til stóra kvöldsins í Kodak-höllinni ef úrslitin verða eitthvað í líkingu við þetta.

Önnur stjarna kvöldsins var án nokkurs vafa Mickey Rourke. Þessi fornfrægi leikari var á góðri leið í ruslakistu C-mynda þegar Robert Rodriguez réð hann til að leika hálfgert skrímsli í Syndabælinu eða Sin City. Ferill Rourkes komst aftur á flug og má segja að hann hafi kórónað endurkomuna með Golden Globe-styttunni fyrir frammistöðu sína í The Wrestler. „Þetta hefur verið löng leið," sagði Rourke þegar hann tók við gullhnettinum. Myndin fékk auk þess önnur verðlaun fyrir besta lagið, en það er gallabuxna­rokkarinn Bruce Spring­steen sem á heiðurinn að því. Það kom fáum á óvart að Heath heitinn Ledger var valinn besti leikari í aukahlutverki sem Jókerinn í Batman-myndinni The Dark Knight. „Hans verður ávallt saknað en mun aldrei gleymast," sagði leikstjórinn Christ­opher Nolan sem tók við verðlaununum fyrir hönd Ledgers.

Loks var það gamanþátturinn 30 Rock sem átti hug erlendu pressunnar í Hollywood en Golden Globe er einmitt haldin á hennar vegum. Aðalleikarar þáttaraðarinnar, Tina Fey og Alec Baldwin, voru bæði verðlaunuð fyrir leik sinn í sjónvarpsþáttunum sem sýndir eru á Skjá einum. Auk þess voru þættirnir valdir þeir bestu. Þáttaröðin Mad Men, sem er á dagskrá Stöðvar 2, var útnefnd besta þáttaröðin í dramatíska flokknum.