Indefence segir væga fyrirvara um Icesave stórhættulega

Indefence hópurinn segir væga fyrirvara í Icesavesamningunum vera stórhættulega. Þeir gagnrýna orð Jóhönnu Sigurðardóttur sem hefur lýst yfir að fyrirvarar við ríkisábyrgð skuli rúmast innan samninganna. Veikir fyrirvarar gætu verið skildir sem ítrustu kröfur Íslendinga.

Ólafur Elíasson, meðlimur Indefence hópsins, segir mikla hættu fylgja því að setja veika fyrirvara á samkomulagið, sem Bretar og Hollendingar muni auðveldlega sætta sig við. „Þessir vægu fyrirvarar gætu verið skildir sem ítrustu kröfur Íslendinga í framtíðinni. Að halda því fram að þjóðarsamstaða muni nást um málamyndafyrirfara um Icesave-samkomulagið, er ótrúlegur útúrsnúningur út úr þeim málstað sem Indefence og þeir 3000 manns sem mættu á Austurvöll í gær hafa haldið fram," segir Ólafur.

Ólafur segir augljóst að mikil hætta fylgi þessum fyrirvörum. „Þá geta Hollendingar og Bretar litið svo á að samningurinn sé felldur, komið síðan seinna aftur af samningsborðinu og vitnað í málamyndafyrirvarana sem ítrustu kröfur Íslendinga."

Í yfirlýsingu sem hópurinn sendi frá sér segir að InDefence skori „á alla alþingismenn að sýna samstöðu með þjóð sinni og verða við óskum hennar um að fyrirvararnir tryggi hagsmuni þjóðarinnar með þeim hætti að í þeim felist ný lausn á Icesavemálinu. Að alþingismenn fylki sér að baki slíkri lausn líkt og þjóðin gerði með táknrænum hætti á Austurvelli í gær."