Seðlabankastjóri lýsti aðdáun á störfum lögreglumanna

Ingimundur Friðriksson seðlabankastjóri setti sig í samband við Stefán Eiríksson í miðri búsáhaldarbyltingunni í lok janúarmánaðar síðastliðins til þess að skila þakklæti til lögreglumanna og annarra starfsmanna lögreglunnar á höfuðborgarsvæðinu frá bankastjórn og starfsmönnum bankans.

Þetta kemur fram í tölvupósti frá Stefáni sem Bylgja Hrönn Baldursdóttir lögregluþjónn birti á heimasíðu Lögreglufélags Reykjavíkur í gær. Í bréfinu segir Stefán að ekkert lát sé á góðum kveðjum, stuðningi og þökkum til lögreglumanna fyrir vel unnin störf á liðnum dögum og vikum.

„Í morgun hafði samband við mig Ingimundur Friðriksson seðlabankastjóri og bað fyrir bestu kveðjur til lögreglumanna og annarra starfsmanna embættisins frá bankastjórn og öllum starfsmönnum Seðlabankans. Sagði hann að lipurð, liðlegheit og fagmennska lögreglunnar hefði vakið aðdáun allra sem í bankanum störfuðu og vildi bankastjórnin fyrir hönd bankans og starfsmanna hans koma á framfæri kærum kveðjum og þökkum til lögreglunnar á höfuðborgarsvæðinu af þessu tilefni. Þessari góðu kveðju var fylgt eftir með áþreifanlegum hætti sem starfsmenn munu fá að njóta í gegnum starfsmannafélag LRH," sagði Stefán í bréfi til lögreglumannanna.