Fjármálaráðherra Hollands: Við gerðum Íslendingum greiða

Fjármálaráðherra Hollands segir að framganga Hollendinga í Icesave málinu hafi verið vinargreiði við Íslendinga. Bretar segjast fagna því að nú megi leiða Icesave-málið til lykta.

Wouter Bos, fjármálaráðherra Hollands, ræddi við fjölmiðla eftir fund hollenskra ráðherra í dag. Hann var spurður um grein Jóhönnu Sigurðardóttur í Financial Times og segir ekkert þar breyta afstöðu hollenskra stjórnvalda.

Hollendingar hafi ekki gengið hart fram, heldur tekið kurteislega yfir ábyrgð á málinu af íslensku ríkisstjórninni. Það hafi verið vinargreiði af hálfu Hollendinga.

Fréttastofan spurði Breta út í fyrirvara við frumvarp um ríkisábyrgð vegna Icesave. Talsmaður Breska fjármálaráðuneytisins segir það eitt, að eins og vænta mátti hafi ríkisstjórn Íslands látið málið fá hefðbundna þinglega meðferð til að tryggja fram fram fari öll sú umfjöllun sem nauðsynleg sé, til þess að lánið, sem Bretar í reynd veita Íslendingum vegna ábyrgðarinnar, nái fram að ganga. Og Bretar virðast telja málinu lokið, því þeir segja góðar fréttir fyrir bæði lönd að málið megi nú leiða til lykta.