Ráðherra hækkar hlutfall makríls í 20%

Jón Bjarnason sjávarútvegs- og landbúnaðarráðherra gaf í dag út nýja reglugerð, sem heimilar að hlutfall makríls sem meðafla megi vera allt að 20% af heildarafla hvers skips úr norsk-íslenska síldarstofninum fyrir tímabilið 9. júlí til 30. september. Heimilt er að flytja meðaflaheimild á milli skipa.

Fjallað er um málið á vefsíðu LÍÚ. Þar segir að eldri reglugerð, sem ráðuneytið gaf út í júlí kvað á um að hlutfall makríls í aflanum mætti vera 12%. Sú reglugerð var sett í kjölfar mikillar makrílveiði þar sem heildaraflinn var orðinn um 100 þúsund tonn.

Vaðandi makríll hefur verið víða í íslensku lögsögunni í sumar og í mun meira mæli en áður eru dæmi eru um. Vegna gildandi takmarkana á makrílveiðunum hafa skip að veiðum á norsk-íslenskri síld að undanförnu átt í erfiðleikum með að stunda þær veiðar vegna makrílgengdar.