Hvetja alla til að smíða töfrahjól

Þeir Valdimar Ómarsson og Stefán Þór Bjarnason eru að útskrifast úr vél- og orkutæknifræði og lokaverkefnið, sem þeir verja á mánudag, er einmitt þetta tæki. Á ensku kallast svona fyrirbæri Segway en þeir kalla sitt tæki Noway, enda hefur ekkert gott íslenskt heiti ennþá fundist á svona jafnvægishjól. Sumir hafa kallað það einhjól, - þótt hjólin séu tvö. Við gætum allt eins kallað það töfrahjól, því það heldur sjálft jafnvægi og notandinn stýrir því með einföldum hreyfingum, það fer áfram, beygir, snýst í hringi eða bakkar, eftir vilja hvers og eins, - það er nánast eins og hugur manns.

Þeir segja að jafnvel klaufskir miðaldra karlar geti stigið beint á hjólið, eða nánast þannig, og ekið af stað. Aðalatriðið sé að treysta hjólinu. Það heldur nefnilega jafnvægi fyrir þig. Galdurinn á bak við þetta eru tölvubúnaður og tveir skynjarar inni í tækinu sem láta það halda jafnvægi og bregðast við hreyfingum notandans. Nú hvetja piltarnir aðra til að smíða sér svona grip og ætla í því skyni að birta leiðbeiningar um hvernig það sé gert.