Beckham óttast ekki um landsliðssætið

David Beckham óttast ekki að sú ákvörðun hans að taka LA Galaxy fram yfir enska landsliðið hafi áhrif á framtíð hans hjá landsliðinu.

Beckham dró sig út úr landsliðshópnum fyrir leikinn gegn Brasilíu til að hjálpa Galaxy í úrslitakeppninni í MLS-deildinni.

„Menn hjá landsliðinu vita að ég er að spila í úrslitakeppninni og við því var búist. Þetta er ekkert vandamál og mér var bara óskað góðs gengis," sagði Beckham sem vantar tíu leiki til að jafna landsleikjamet Peter Shilton.

„Ég reyni að vera klár í hópinn hverju sinni. Ég er búinn að spila 115 leiki. Það er vissulega gaman að slá met en það skiptir ekki mestu máli. Ég er ekki að telja hvern leik þó svo það yrði gaman að jafna Shilton. Aðalmálið er liðið og hefur alltaf verið."