FIFA neitar beiðni knattspyrnusambands Írlands um nýjan leik

Alþjóðaknattspyrnusambandið FIFA hefur samkvæmt heimildum BBC fréttastofunnar ákveðið að verða ekki við beiðni knattspyrnusambands Írlands um að seinni umspilsleikur Íra og Frakka verði spilaður á ný vegna dómaramistaka sem kostuðu Íra sigur í leiknum.

Umrædd dómaramistök áttu sér stað í framlengingu leiksins þegar Frakkinn Thierry Henry komst upp með að handleika knöttinn í tvígang áður en hann gaf stoðsendingu á sigurmarki William Gallas í leiknum.

Frakkar komust þar með á lokakeppni HM næsta sumar en Írar sitja eftir með sárt ennið.

„Það er engin möguleiki að leikurinn verði spilaður á ný. Ef FIFA myndi gera það þá myndi það valda algjörum glundroða í fótboltaheiminum," sagði ónefndur heimildarmaður innan raða FIFA í viðtali við BBC.