Þráinn segir fyrr frjósa í helvíti en hann gangi í Samfylkinguna

Þráinn Bertelsson þingmaður Borgarahreyfingarinnar segir að fyrr frjósi í Víti heldur en að hann yfirgefi flokkinn og gangi til liðs við Samfylkinguna. Hann segist vona að ósætti innan flokksins leysist svo hann geti starfað áfram.

Ósætti hefur verið innnan Borgarahreyfingarinnar frá því atkvæðagreiðsla fór fram á þingi um aðildarviðræður við Evrópusambandið. Þráinn Bertelsson þingmaður Borgarahreyfingarinnar var sá eini af fjórum flokksmönnum sem greiddi atkvæði með aðildarviðræðum og sakaði hina þrjá sem greiddu atkvæði gegn viðræðum um svik á kosningaloforðum flokksins. Þráinn segist vona að ósætti innan flokksins leysist sem fyrst svo flokkurinn geti starfað áfram sem ein heild.

„Ég vona að stjórn borgarahreyfingarinnar og þessir þremenningar sem eru með mér í þinghópnum finni lausn á sínum ágreiningsefnum og ég vil bara halda mig til hlés í þeim deilum því þær snúast á engan hátt um mig," segir Þráinn í samtali við Fréttastofu.

Aðspurður hvort hann hafi hugleitt að ganga úr flokknum og til liðs við Samfylkingu hlær hann dátt og svarar: „Ætli það frjósi ekki fyrr í víti heldur en að ég skipti um flokk. Ég skil ekki hvernig nokkur lifandi maður með óbrenglaða dómgreind og góðan vilja getur dregið þá ályktun um að ég sé á leiðinni í einhvern annan stjórnmálaflokk. Ég hef starfað samkvæmt stefnu flokksins og hef hugsað mér að gera það áfram."