Yfirvinna endurskoðuð - engar uppsagnir

Hallur Páll Jónsson, mannauðsstjóri Reykjavíkurborgar, segir að við endurskoðun á yfirvinnu hjá starfsmönnum Reykjavíkurborgar hafi rauði þráðurinn í aðgerðunum verið að tryggja störf starfsmanna. Þeir sem hæst launin hafa taka á sig hlutfallslega mesta lækkun fastra heildarlauna og við endurskoðun fastlaunasamninga sé sú regla höfð i heiðri að lækka ekki föst heildarlaun sem eru undir 300 þúsund krónum.

„Staðreyndin er sú að með öllum hinum fjölmörgu atriðum til hagræðingar og sparnaðar í rekstri er Reykjavíkurborg að leggja áherslu á þau meginmarkmið sem borgarstjórn hefur sett: að standa vörð um störfin og grunnþjónustuna," er haft eftir Halli í tilkynningu frá Reykjavíkurborg.

Tímabundnar aðgerðir

„Reykjavíkurborg eins og önnur sveitarfélög og fyrirtæki þurfa að hagræða í rekstri í ljósi þess efnahagsástands sem ríkir á Íslandi. Farið hefur verið yfir allan rekstur borgarinnar, og gripið til hagræðingar í stjórnsýslu, innkaupum auk almennrar lækkunar rekstrarkostnaðar. Laun hafa verið lækkuð hjá borgarfulltrúum og æðstu stjórnendum og nú stendur yfir endurskoðun á yfirvinnu hjá starfsmönnum. Þessar aðgerðir miða að því að koma í veg fyrir uppsagnir starfsfólks og aukið atvinnuleysi. Starfsmenn eru ekki að gefa eftir kjarasamningsbundin réttindi sín velji þeir að gera nýja fastlaunasamninga sem taka gildi 1. febrúar nk. Aðeins er verið að segja upp og taka til endurskoðunar persónubundin kjör einstakra starfsmanna og í reglum um fastlaunasamninga er beinlínis gert ráð fyrir að þeir séu endurskoðaðir með reglulegu millibili, m.a. vegna breytinga á yfirvinnuþörf vinnuveitanda.

• Einungis er um endurskoðun á yfirvinnu að ræða - ekki uppsagnir starfsfólks.

• Þeir sem þiggja hæstu laun taka á sig meiri skerðingu fastra heildarlauna en þeir sem lægri laun hafa.

• Meginreglan við endurskoðun fastlaunasamninga er að lækka ekki föst heildarlaun sem eru undir 300 þúsund krónum á mánuði.

• Aðgerðir eru samræmdar fyrir borgarkerfið og jafnræðis er gætt á milli starfsmanna og fagsviða eins og kostur er, samhliða því að framkvæmdin verði gegnsæ og ákvarðanir málefnalegar.

Þessar mikilvægu hagræðingar- og aðhaldsaðgerðir eru tímabundnar og gert er ráð fyrir að þær verði endurskoðaðar í ljósi fjárhagsstöðu borgarinnar. Samráð hefur verið haft við forystumenn heildarsamtaka launþega og fjölmennustu stéttarfélaganna og þeim kynntar fyrirhugaðar aðgerðir," segir í tilkynningunni.