Landsliðsþjálfari Íran: Ísland sterkasti kosturinn

Knattspyrnusamband Íran hélt í gær fréttamannafund þar sem tilkynnt var um vináttulandsleik Íran og Íslands í Teheran í næsta mánuði.

Framkvæmdarstjóri sambandsins tilkynnti þetta og sagði að því hefði staðið til boða nokkrir kostir.

„Fjögur lönd voru reiðubúin að koma til Teheran og spila. Þau voru Namibía, Færeyjar, Úganda og Ísland," sagði framkvæmdarstjórinn og sagði að landsliðsþjálfari Íran, Afshin Ghotbi, hefði kosið að mæta Íslandi þar sem hann taldi það vera með sterkasta liðið af þessum fjórum.

Ísland hefur nú ekki tapað í fjórum leikjum í röð en liðið vann síðast sigur á Suður-Afríku, 1-0, á þriðjudaginn síðastliðinn.