Maradona um Messi: Allir áttu að borga aftur fyrir miðann

Diego Maradona, þjálfari argentínska landsliðsins, var sáttur eftir fyrsta keppnisleikinn undir hans stjórn en Argentína vann þá 4-0 sigur á Venesúela. Maradona var sérstaklega ánægður með Lionel Messi sem er kominn í tíuna í argentínska landsliðinu.

Lionel Messi skoraði fyrsta mark leiksins á 26. mínútu og lagði það næsta upp fyrir Carloz Tevez. Maximiliano Rodriguez og Sergio Aguero innsigluðu svo sigurinn.

„Það eru forréttindi að fá að sjá Messi spila á hverjum degi. Við ættum öll að fara útaf vellinum og borga aftur fyrir miðann okkar," sagði Maradona en það er þó ekki líklegt að hann hafi nokkurn tímann keypt sér miða á völlinn en það er nú önnur saga.

Argentína náði með sigrinum að minnka forskot Paragvæ í fjögur stig á toppi Suður-Ameríku riðilsins og komast upp fyrir Brasilíu sem náði aðeins jafntefli á móti Ekvador.