Hyypia sneri til Englands meiddur á hné

Miðvörðurinn Sami Hyypia hjá Liverpool sneri snemma til baka til Liverpool eftir landsleik Finna og Walesverja eftir að hafa meiðst á hné.

Hinn 35 ára gamli Hyypia verður sendur í frekari skoðun í herbúðum Liverpool eftir því sem fram kemur í Liverpool Echo en grunur leikur á um að hann sé með sködduð liðbönd.

Ef svo er verður Finninn stóri væntanlega ekki með Liverpool í næstu leikjum og kæmi það illa við liðið þar sem það hefur verið á góðri siglingu að undanförnu.

Rafa Benitez knattspyrnustjóri hefur þegar fengið þau tíðindi að miðjumaðurinn Yossi Benayoun hafi meiðst á kálfa þegar hann var að spila með landsliði Ísrael og þá þykir ljóst að miðjumaðurinn Javier Mascherano muni ekki snúa aftur til Liverpool fyrr en um sólarhring fyrir leik liðsins gegn Fulham um næstu helgi. Hann verður þá nýkominn úr 14 tíma flugi.