Sonur Maradona stendur með föður sínum

Diego Armando Maradona, landsliðsþjálfari Argentínu, hefur mátt þola mikla gagnrýni eftir að hann tók við landsliðsþjálfarastarfinu.

Þrátt fyrir það tókst honum að koma liðinu á HM en með naumindum þó.

Sonur Maradona, sem heitir einnig Diego Maradona, hefur tekið upp hanskann fyrir föður sinn og segist hafa tröllatrú á honum.

„Það getur enginn kennt Diego hvernig á að vinna HM með Argentínu eða hvernig eigi að vera í treyjunni," sagði sonurinn.

„Ég hef alltaf stutt Argentínu og mun gera það áfram næsta sumar þegar faðir minn verður á bekknum."

Diego yngri mun taka þátt á HM í strandfótbolta um miðjan mánuðinn en hann var valinn í ítalska landsliðið.