Benjamin með 13 Óskarstilnefningar

Rómantíska fantasían The Curious Case of Benjamin Button hlaut þrettán tilnefningar til Óskarsverðlaunanna í ár. Næst á eftir kom Slumdog Millionaire með tíu tilnefningar.

Báðar ofantöldu myndirnar voru tilnefndar sem besta myndin ásamt Frost/Nixon, Milk, The Reader og Slumdog Millionaire.

The Dark Knight var aftur á móti ekki tilnefnd eins og svo margir höfðu vonast eftir. Hún fékk engu síður átta tilnefningar, þar á meðal Heath Ledger sem besti aukaleikarinn, en engar í stærstu flokkunum.

Tilnefning Ledgers kom nákvæmlega ári eftir að hann lést af völdum of stórs lyfjaskammts. Margir telja að hann eigi Óskarinn vísan, enda þótti hann standa sig einkar vel sem Jókerinn eins og Golden Globe-verðlaun hans bera vitni um. Fái Ledger verðlaunin verður það í annað sinn sem leikari fær Óskarinn eftir dauða sinn. Sá fyrsti var Peter Finch árið 1976 fyrir hlutverk sitt í Network.

Sem besti aðalleikarinn voru tilnefndir Brad Pitt (Benjamin Button), Frank Langella (Frost/Nixon), Sean Penn (Milk), Richard Jenkins (The Visitor) og Mickey Rourke (The Wrestler), sem vann einmitt Golden Globe-verðlaunin á dögunum fyrir hlutverkið.

Kate Winslet, sem vann tvenn Golden Globe-verðlaun, var tilnefnd sem besta leikkonan fyrir hlutverk sitt í The Reader ásamt þeim Anne Hathaway (Rachel Getting Married), Melissa Leo (Frozen River), Angelinu Jolie (Changeling) og Meryl Streep (Doubt), sem hlaut þarna sína fimmtándu Óskarstilnefningu.

Í flokknum besti leikarinn í aukahlutverki voru tilnefndir auk Heaths Ledger, þeir Josh Brolin (Milk), Robert Downey Jr. (Tropic Thunder), Philip Seymour Hoffman (Doubt) og Michael Shannon (Revolutionary Road). Í kvennaflokki fengu þær Amy Adams (Doubt), Penélope Cruz (Vicky Christina Barcelona), Viola Davis (Doubt), Taraji P. Henson (The Curious Case of Benjamin Button) og Marisa Tomei (The Wrestler) tilnefningar.

Þá voru Wall-E, Bolt og Kung Fu Panda tilnefndar sem bestu teiknimyndirnar og einnig voru Entre les murs (Frakklandi), Okuribito (Japan), Revanche (Austurríki), Vals im Bashir (Ísrael) og Der Baader Meinhof Komplex (Þýskalandi) tilnefndar sem bestu erlendu myndirnar.

Óskarsverðlaunin verða afhent í 81. sinn í Kodak-leikhúsinu í Hollywood 22. febrúar.