Hafa ekki áhyggjur af mannréttindahlið kyrrsetningarfrumvarps

Efnahags- og skattanefnd ræddi um frumvarp um kyrrsetningu eigna í morgun og fékk fulltrúa réttarfarsnefndar til fundar við sig.

Í frumvarpinu, sem beinist að lögum um tekjuskatt, er kveðið á um rýmri heimildir skattrannsóknarstjóra til að kyrrsetja eignir til tryggingar greiðslu væntanlegrar skattkröfu, fésektar eða sakarkostnaðar ef hætta þykir á að eignum verði annars skotið undan eða þær glatist eða rýrni.

Lögmaðurinn Ragnar Aðalsteinsson er einn þeirra sem hefur gagnrýnt frumvarpið fyrir að tryggja ekki mannréttindi sakborninga og sagði meðal annars í viðtali við Fréttablaðið að endursemja þyrfti frumvarpið.

„Það kom fram í morgun hjá fulltrúa réttarfarsnefndar að það væri kannski ekki ástæða til þess," segir Lilja, en réttarfarsnefnd tekur ekki undir þær áhyggjur sem Ragnar hefur sett fram.

Lilja bendir einnig á að mannréttindi sakborninga séu tryggð í öðrum lögum sem gilda um kyrrsetningu eigna, svo og í lögum um meðferð sakamála.

Lilja vonast til að hægt verði að taka málið úr nefnd á morgun, en það fer eftir því hversu breið samstaða næst um málið í nefndinni.

Enn á eftir að semja um hvort málið komist á dagskrá og klárist fyrir þinglok, en það er samkomulagsatriði milli þingflokksformannanna.