Stjórnarformaður OR: Hefur ríkið áhuga á HS Orku?

Guðlaugur G. Sverrisson, stjórnarformaður Orkuveitu Reykjavíkur hefur óskað eftir fundi með fjármálaráðherra vegna sölu á hlutabréfum í HS Orku. Í yfirlýsingu sem hann sendi frá sér seint í gær segir að yfirlýst andstaða umhverfisráðherra og annara fulltrúa VG stangist á við afstöðu iðnaðarráðherra sem telji heppilegt að þessi sala fari fram. „Í því ljósi er mikilvægt fyrir Orkuveitu Reykjavíkur að vita hvort ríkið hafi raunverulegan áhuga á að eignast umræddan hlut eða ekki," segir Guðlaugur.

Hann bendir einnig á að samkeppnisyfirvöld hafi úrskurðað að Orkuveitan megi ekki eiga meira en 10 prósenta hlut í fyrirtækinu og í ljósi þess hefur hluturinn verið auglýstur til sölu. „Söluferlið hefur verið opið og hefur ríkið eins og aðrir áhugasamir aðilar haft alla möguleika á því að koma að því borði. Nú liggur fyrir kauptilboð sem þarf að taka afstöðu til og því afar mikilvægt að ríkisstjórn Íslands svari því afdráttarlaust hver vilji hennar er í málinu," segir Guðlaugur Sverrisson að lokum.